Brúum bilið

Í lögum og aðalnámskrám bæði leik- og grunnskóla, er kveðið á um að sveitarstjórnir skuli koma á samstarfi milli skólastiganna. Grunnur að slíku samstarfi var lagður með samstarfi Grundaskóla og Garðasels árið 1994, en formlegt samstarf á milli leikskóla og grunnskóla á Akranesi hófst þegar rekstur grunnskóla fluttist yfir til sveitarfélaganna og skólaskrifstofa Akraness tók til starfs 1996.

Það eru ólíkir starfshættir og umhverfi í leikskóla og grunnskóla og því oft mikil breyting fyrir barn að fara á milli þessara skólastiga.

Markmið með samstarfinu brúum bilið er:

• Að tengja skólastigin saman
• Að skapa samfellu í námi og kennslu nemenda á þessum tveimur skólastigum
• Að byggja upp gagnkvæma þekkingu og skilning á starfi kennara á hvoru skólastigi
• Að stuðla að vellíðan og öryggi barna við að fara úr leikskóla í grunnskóla
• Að skapa farveg fyrir miðlun upplýsinga á milli þessara skólastiga

Teigasel og Brekkubæjarskóli eru í samstarfi með að brúa bilið milli skólastiganna, en áður en 5 ára börnin heimsækja samstarfsskólann fara þau í skólastjóraheimsókn í báða grunnskólana. Skólastjóraheimsóknir kallast svo, þar sem skólastjórinn tekur á móti hópnum og kynnir skólann fyrir þeim. Þessar heimsóknir fara alla jafna fram í septembermánuði.

Í október hefjast svokallaðar skiptinemaheimsóknir, en þá fer lítill hópur frá Teigaseli í heimsókn í 1. bekk og hópur þaðan kemur til okkar. Börnin fara með nesti með sér og fá að prófa að vera í kennslustund, borða nesti og fara í frímínútur. Við stefnum á að öll börn fái að fara í eina heimsókn fyrir jól og 2 heimsóknir eftir jól. auk þess fara þau í nokkrar „morgunstundir“ hjá Brekkubæjarskóla yfir veturinn. Einnig hefur okkur verið boðin afnot af íþróttasal í Íþróttahúsinu við Vesturgötu, svo börnin fái líka að kynnast þeirri hlið skólastarfsins.

Nánar um samstarf leik- og grunnskóla má lesa hér