Eldvarnarstarf 
Slökkvilið Akraness og leikskólarnir á Akranesi hafa ákveðið að taka höndum saman um að auka öryggi barnanna og starfsfólksins með öflugu eldvarnareftirliti og fræðslu.
Verkefnið fer þannig fram að slökkviliðin heimsækja leikskólana tvisvar sinnum á hverju ári. Í fyrri heimsókn er gengið úr skugga um að eldvarnir leikskólans séu í lagi. Í þeirri síðari heimsækja slökkviliðsmenn elstu börnin á leikskólanum og fræða þau um störf sín og eldvarnir. Þá fá börnin sérstaka viðurkenningu og möppu með verkefnum og upplýsingum um eldvarnir. Börnin hafa möppuna með sér heim og skilar fræðslan sér þannig til heimilanna. Á milli heimsókna slökkviliðsins annast leikskólinn eigið eldvarnaeftirlit mánaðarlega með þátttöku barnanna. Leikskólinn skuldbindur sig einnig til að gera rýmingaráætlun og æfa rýmingu árlega, samkvæmt samkomulagi sem aðilar gera með sér í upphafi.
Markmið verkefnisins er þríþætt:
- Að tryggja að eldvarnir í leikskólunum verði ávallt eins og best verður á kosið.
- Að veita elstu börnunum fyrstu fræðslu um eldvarnir og kynna fyrir þeim störf slökkviliðsmanna og búnað.
- Að minna foreldra og forráðamenn barnanna á mikilvægi þess að hafa eldvarnir heimilisins í lagi og veita þeim leiðbeiningar um hvernig ná má því marki.
Útbúið hefur verið fjölbreytt og vandað fræðsluefni og önnur gögn í þessu starfi. Sérstakir aðstoðarmenn slökkviliðsins í verkefninu eru slökkviálfarnir Logi og Glóð sem eru jafnframt helsta auðkenni verkefnisins.
