Bolludagur - sprengidagur - öskudagur

Eins og aðrir landsmenn höldum við bolludaginn, sprengidaginn og öskudaginn hátíðlegan í Teigaseli. Í dag, bolludag, eru fiskibollur og tilheyrandi í hádegismat og vatnsdeigsbollur með rjóma í eftirrétt. Á morgun, sprengidag, er svo boðið upp á saltkjöt og baunir í hádeginu og allir borða sig sprengsadda. Á öskudaginn mætum við svo í náttfötunum, hittumst öll í salnum og "sláum köttinn úr tunnunni" eins og undanfarin ár. Þegar "tunnan" opnast veltur venjulega eitthvað góðgæti úr henni og eigum við von á að svo verði einnig þetta árið :)

Samkvæmt Vísindavef Háskóla Íslands, hafa þróast ýmsir siðir í gegnum tíðina í kringum bolludag, sprengidag og öskudag. Athyglisvert er að bolludagur (sem væntanlega fékk ekki nafnið fyrr en snemma á 20. öld) og öskudagur hafa að nokkru leyti skipt um hlutverk. Lengi vel var mánudagurinn í 7. viku fyrir páska hefðbundinn frídagur barna í skólum og þá tíðkaðist víða um landið að „marséra“ í grímubúningum og að slá köttinn úr tunnunni, seint á 19. öld. Þeir siðir hafa væntanlega borist frá Danmörku eða Noregi. Árið 1917 hafði frídagurinn verið færður yfir á öskudaginn víðast hvar á landinu og siðirnir fluttust með.

Ein er sú hefð tengd öskudeginum sem ekki finnst annars staðar en á Íslandi, en það er sú venja að hengja öskupoka á fólk. Kannski má rekja upphaf þess til katólskunnar og krafts öskunnar sem gjarnan var mögnuð með heilögu vatni. Sóttu menn í að taka ösku með sér heim úr kirkjum til að blessa heimilið.Hér skiptist pokasiðurinn lengi vel í tvennt eftir kynjum: konur hengdu öskupoka á karla en karlar poka með steinum á konur. Líklegt er að ólík kynjahlutverk og aðgengi að hlutum hafi þar skipt máli, en lykilatriði hjá báðum kynjum var að koma pokunum fyrir svo að fórnarlambið tæki ekki eftir því.