Stig af stigi

 Stig af stigi er kennsluefni fyrir 4-10 ára börn.  Námsefninu er skipt upp í þrjá hluta og er sá fyrsti ætlaður tveimur elstu árgöngunum í leikskóla og fyrsta bekk í grunnskóla.  Á þessum árum standa börnin frammi fyrir mörgum vanda.  Þau kynnast margs konar nýju umhverfi, nýjum félögum og öðrum fullorðnum.

Markmið kennslunnar er að:
 

1. Að þjálfa börnin í innlifun, sem þýðir að
   - viðurkenna tilfinningar annarra
   - ráða í tilfinningar annarra
   - setja sig í spor annarra
   - sýna öðrum tillitssemi

2. Að minnka líkur á hegðun sem einkennist af skyndilegum hugdettum, skyndihvötum og hugsunarleysi, með því að
   - kenna börnum að leysa deilur og árekstra á skipulegan hátt
   - efla félagsfærni barnanna

3. Að minnka líkur á að börnin sýni hvert öðru frekju og yfirgang með því að
   - kenna þeim að þekkja reiðitilfinningar
   - nota afslöppunartækni til að hafa hemil á sjálfum sér

Sum börn tileinka sér félagsfærni sjálfkrafa og vandræðalaust í frumbernsku.  Önnur gera það ekki og ástæður þess geta verið margar, m.a.:

• Sum börn vita ekki hvaða hegðun er við hæfi vegna þess að þau vantar jákvæða fyrirmynd einhvers fullorðins sem getur sýnt þeim ýmsar aðferðir til að leysa úr vanda.

• Sum börn vita hvaða hegðun er við hæfi en vantar þjálfun í að beita kunnáttunni vegna skorts á stuðningi og eftirfylgni þegar þau hegða sér ákjósanlega.

• Sum börn hafa sterkar tilfinningar, svo sem reiði eða ótta sem hindra æskilega hegðun.

• Sum börn meta frekju, yfirgang go jafnvel ofbeldi á óæskilegan hátt og hafa á öllu þrennu andfélagslegar skoðanir, sem jafnvel er ýtt undir.

• Sum börn hafa seinkaðan þroska.

Börn læra hegðun með því að herma eftir, æfa og styrkja færni sína.  Með námsefninu Stig af stigi er börnum markvisst kennt að vinna með hegðun og viðbrögð og æfa þau sig með því að endurtaka aðstæður.  Mikilvægt er að foreldrar barnanna taki þátt í þessari markvissu vinnu. 

Stig af stigi á Háteigi

Við á Háteigi erum í lífsleikni á fimmtudögum  kl. 12:40 og erum í 15 til 20 mínútur í hvert skipti.  Við erum öll saman og oft verða fjörugar umræður.

En lífsleikninámið er ekki bara bundið við þann tíma sem við erum í lífsleiknistund, heldur er eftirfylgd í daglegu starfi mjög mikilvæg.  Við notum hvert tækifæri sem gefst til að minna á hvað við ræddum í lífsleikni ef upp koma aðstæður þar sem börnin geta notað Stig af stigi til að leysa úr vanda eða skilja og lesa í líkamstjáningu eða tilfinningar annarra.  Við hvetjum ykkur foreldra / aðstandendur til að gera slíkt hið sama