Forsíða :: Deildir :: Teigakot :: Deildarnámskrá

Deildarnámskrá Teigakots

Leikurinn

Leikurinn er hornsteinn leikskólastarfsins. Hann er lífstjáning og gleðigjafi barnsins og um leið er hann mikilvægasta þroskaleið þess.

Í leik lærir barn margt sem enginn getur kennt því. Honum fylgir bæði gaman og alvara og hann endurspeglar reynsluheim barnsins. Til þess að leikurinn geti þróast og elfst þarf barn upplifun, hugmyndaflug og efnivið.

Markmið :

Að skapa barninu góðar leikaðstæður svo það fái útrás fyrir sköpunar- og leikgleði sína.
Að barnið læri að tjá tilfinningar sínar og sýna öðrum tillitssemi.
Að efla samskiptafærni barnsins.
Að efla frumkvæði barnsins og skapa því þannig aðstæður að frumkvæði þess fái notið sín.
Að styrkja innri áhugahvöt barnsins og efla það til sjálfsnáms.

Daglegt líf í leikskóla

,,Að vera í skóla er ekki undirbúningur fyrir lífið, það er lífið”

John Dewey 1973

Daglegt líf í leikskóla markast af föstum athöfnum sem lúta að líkamlegum þörfum barna og heilsu. Á ákveðnum tímum matast börn, þvo sér, hvíla sig og sofa. Dagskipulagið er sniðið að þörfum barna, þroska þeirra, aldri, samsetningu barnahóps, dvalartíma og öðrum ytri skilyrðum.

Í fataherberginu öðlast barnið færni í að hjálpa sér sjálft við að klæða sig í og úr. Barnið fær leiðbeiningu og stuðning frá hinum fullorðna. Áhersla er lögð á góða umgengni í fataherberginu.

Barnið læri að verða sjálfbjarga með salernisferðir, þvoi sér um hendur og læri almennar hreinlætisvenjur.

Við borðhald gefst gott tækifæri til að styrkja góða borðsiði og barnið æfir sig í að smakka á því sem er boðið upp á.

Hvíldartími gefur tækifæri til að skapa tengsl við hvert einstakt barn og barnahópinn sem heild. Tekið er tillit til þarfa hvers einstaklings, meðan sumir þurfa svefn, fá aðrir rólega stund þar sem hlustað er á sögur og ævintýri.

Námssvið leikskóla

,,Námssvið leikskóla eru áhersluþættir í leikskólauppeldi. Þau eru hreyfing, málrækt, myndsköpun, tónlist, náttúra og umhverfi, menning og samfélag. Námssviðin skarast og þaueru samofin undirstöðuþáttum leikskólastarfs : leik, daglegri umönnun og almennri lífsleikni”

Hreyfing

Barnið hefur ríka þörf fyrir að hreyfa sig frjálst og óhindrað. Leikir sem reyna á líkamann, veita barninu útrás. Því ber leikskólanum að leggja áherslu á hreyfingu og hreyfiuppeldi.

Markmið :

Að auka / efla líkamlegt úthald.
Að barnið fái útfás fyrir hreyfiþörf sína.
Að barnið læri að meta aðstæður, velja, hafna og þora.
Að efla samhæfingu hreyfinga og jafnvægi og auka þannig öryggi barnsins og færni þess til að stjórna líkama sínum.

Mál og málörvun

Tungumálið er mikilvægasta boðskiptatæki mannsins og jafnframt stór þáttur í menningu þjóða og þjóðarbrota. Leikskólinn leggur því mikla áherslu á málrækt og fléttar hana inn í leikinn og annað daglegt starf í leikskólanum.

Markmið :

Að barnið fái tækifæri til að tjá hugsanir sínar, tilfinningar, skoðanir og fyrirætlanir.
Að varðveita menningararf íslenskrar tungu, með því að tengja saman fortíð og framtíð með móðurmálinu.
Að efla málskilning, málnotkun, orðaforða oghugtakaskilning barna.
Að efla markvisst hljóðkerfisvitund barnanna og búa þau þannig undir lestrarnám.
Að allir starfsmenn sameinist um það að hafa fyrirbörnunum rétt og fallegt íslenskt mál.

Myndsköpun

Myndsköpun er mikilvægur tjáningarmiðill og hafa börn mikla þörf fyrir að tjá sig með myndmáli, hvert á sínum forsendum. Með myndsköpun er átt við það að barnið málar, teiknar eða mótar myndverk eftir eigin hugmyndaflugi á sinn sérstæða hátt. Barnið endurspeglar oft í myndverkum sínum þá reynslu sem það hefur upplifað, tilfinningar sem bærast með því og það sem er því hugleikið.

Markmið :

Að barnið fái útrás fyrir sköpunar- og rannsóknarþörf sína.
Að efla samhæfingu handa og augna sem og fín- og grófhreyfingar barnsins.
Að efla sjálfstraust barnsins.
Að barnið þroski með sér einbeitingu.
Að barnið fái tækifæri til að endurupplifa og túlka reynsluheim sinn á eigin forsendum.

Tónlist

Tónlist er mikilvæg fyrir alhliða þroska barnsins, ekki eingöngu sem þáttur í faguruppeldi heldur einnig til eflingar tilfinninga-, hreyfi- og vitsmunaþroska þess. Hún er einnig mikilvægur menningararfur frá kynslóð til kynslóðar.

Markmið :

Að barnið þroski með sér næmi fyrir hljóðum, hreyfingu og hrynjandi.
Að efla frumkvæði barnsins í sköpun, túlkun og tjáningu tónlistar.
Að veita barninu tækifæri til að njóta tónlistar og tengja hana öðrum listformum s.s. myndsköpun, dansi o.fl.

Náttúra og umhverfi

Náttúran er samofin lífsafkomu mannsins. Að kunna skil á náttúrunni og að bera virðingu fyrir henni, ásamt náttúruöflunum getur verið manninum lífsnauðsynleg. Umhverfisvitund er einnig nauðsynlegt innlegg í leikskólastarfi þegar horft er til framtíðar.

Markmið :

Að barnið kynnist sínu nánasta umhverfi.
Að barnið verði meira meðvitað um náttúruna og það sem býr í henni.
Að kynnast fjölbreytileika náttúrunnar og læra að njóta hennar.
Að efla ábyrgðarkennd barnsins gagnvart umhverfi sínu.
Að kynna fyrir barninu hringrás náttúrunnar.

Menning og samfélag

Barn kynnist smám saman því samfélagi sem það lifir í, í samspili við umhverfi sitt og annað fólk. Leikskólinn tekur þátt í þessu samspili ognýtir í leikskólastarfinu þau menningarlegu og félagslegu tækifæri sem umhverfi hans og staðsetning gefur kost á.

Markmið :

Að barnið fái tilfinningu fyrir því að það tilheyri samfélaginu.
Að barnið kynnist ólíkum fjölskyldugerðum og ólíkum menningarheimum.
Að barnið kynnist nánasta umhverfi sínu og finni sig öruggt.
Að barnið kynnist hinum ýmsu hátíðum og hefðum í íslensku þjóðlífi.

Leiðir í leikskólastarfi

Í daglegu starfi leikskólans, sbr. dagskipulag, förum við eftirfarandi leiðir að markmiðum þeim sem nefnd eru í námssviðunum :

Hópastarf

Hópastarf er fjórum sinnum í viku og er unnið markvisst með eftirfarandi þætti;

Listsköpun; Börnin fá að vinna á sínum forsendum skemmtileg listaverk.
Einingakubba; Kubbaleikir eru undirstaða stærðfræðinnar, börnin læra um stærð, lengd, form, fjölda, röðun, rými og þyngd í gegnum leik með kubba.
Málrækt; áhersla lögð á að efla tjáskiptafærni, unnið með spilum og málörvunarleikjum.
Útiveru og hreyfingu; skipulagðir og sjálfsprottnir hreyfileikir í útiveru, gönguferðir og náttúruskoðun, með það að markmiði að efla samhæfingu, stöðuskyn, úthald og þekkingarleit.
Könnunarleik:

Könnunarleikur

Könnunarleikurinn (heurestic play) byggir á því að bjóða börnunum upp á aðgang að efnivið, ólíkum hlutum sem þau geta leikið sér með, kannað og gert uppgötvanir upp á eigin spýtur. Börn á öðru ári hafa mikla þörf fyrir að rannsaka og uppgötva upp á eigin spýtur hvernig hlutir haga sér í rými þegar þau stjórna þeim. Þau þarfnast mikillar fjölbreytni í hlutum til að geta stundað þessar rannsóknir sínar, hluti sem eru sífellt nýir og áhugaverðir og það eru hlutir sem er ekki hægt að kaupa úr leikfangavörulistum.

Með könnunarleiknum gefum við barninu tækifæri til að uppgötva margvíslegan efnivið og þroska athyglisgáfur sínar. Boðið er upp á könnunarleikinn á afmörkuðu svæði sem er nógu stórt til að börnin geti hreyft sig tölvert um.

Leikefnið sem boðið er upp á er margvíslegt og er það geymt í pokum eða aðgengilegum körfum.

Leikefnið er til dæmis :

Mismunandi tegundir af ílátum :öskjur úr pappa og tré, kökubox, eggjabakkar, öskju með loki, plastflöskur o.fl.
Hlutir sem rúlla :borðtenniskúlur, rör (plast, pappi, málmur), tvinnakefli, pappahólkar o.fl.
Aðrir hlutir :þvottaklemmur úr tré, keðjur af ýmsum gerðum, krukkulok (málmur, plast), gardínuhringir, könglar, skeljar, gamlir lyklar, alls konar borðar o.fl.

Hreyfistundir í sal

Skipulagðar hreyfistundir í sal þar sem börnin fá útrás fyrir hreyfiþörf sína, auka líkamlegt úthald sitt, efla samhæfingu hreyfinga og jafnvægis sem eykur öryggi þeirra og færni til að stjórna eigin líkama.

Valtími

Valtímar eru umgjörð um frjálsa leikinn. Í valtíma er boðið upp á fjölbreytt viðfangsefni, þar sem börnin geta valið sér svæði eftir áhugasviði sínu. Valmöguleikar eru settir upp á myndrænan hátt.

Valsvæði :

Listakrókur
Bílaleikur
Hlustun
Leikdeig
Byggingaleikir
Þemakassi
Spil
Perla, pinna og þræða
Útivera
Salur
Hopp og skopp

Samvera

Samverur barnanna yfir daginn taka tillit til margra þátta s.s. hlustunar á sögur og ævintýri, söngva og samræðna. Ýmis fræðsla fer fram í samverustundum.

Alstundir eru tvisvar í mánuði í salnum. Allar deildirnar hittast og eiga saman notalega stund með söng, dansi, leikjum og uppákomum. Sungið er fyrir afmælisbörn hvers mánaðar.

Útivera

Útivera og hreyfing eru samtengdir þættir. Í útiveru komast börn í snertingu við náttúruna, þau skynja nánasta umhverfi sitt og læra að meta það. Útileiksvæði leikskólans býður upp á fjölbreytta möguleika til allskonar hreyfileikja, bæði sjálfsprottinna og skipulagðra.

Vettvangsferðir eru einn þáttur útiverunnar. Farið er í gönguferðir, skoðunarferðir og heimsóknir til fyrirtækja.

Markviss málörvun

Markviss málörvun felur í sér kerfisbundin vinnubrögð í leik og miðar að því að tengja talmál og ritmál, að undirbúa tengsl stafs og hljóðs. Leikið er með hlustun, rím, samstöfur, setningar og orð.

Tákn með tali

Í leikskólanum er “Tákn með tali” okkar annað mál. Tákn með tali byggir á náttúrulegri tjáningu líkamans og grundvallast fyrst og fremst á látbragði og svipbrigðum. Táknin eru notuð sem stuðningur við talmál og táknuð eru lykilorð setninga.

Sjónrænt skipulag

Sjónrænt skipulag auðveldar börnum að skipuleggja sig og verða örugg í daglegu starfi í leikskólanum. Sjónræna skipulagið tekur til dagsskipulagsins, veðurs, fatnaðar o.fl.

Foreldrasamstarf

Mikilvægt er fyrir barnið að gott samstarf og traust sé á milli foreldra og leikskóla. Foreldrasamstarf fer fram með daglegum samskiptum, foreldraviðtölum og foreldrafundum.

Mikilvægt er að gott upplýsingastreymi sé á milli heimilis og leikskóla.

Starfsfólk

Stína deildarstjóri, 8.00-16.00

Elizbieta leikskólakennari, 7.45-15.45

Valdís leiðbeinandi/ leikskólakennaranemi, 8.00-13.00

Hilda leiðbeinandi, 8.30-14.30

Katarzyna leiðbeinandi, 13.00-17.00

Hugrún, leiðbeinandi/grunnskólakennaranemi 13.00-17.00