Könnunarleikur

Börn á öðru ári hafa mikla þörf fyrir að rannsaka og uppgötva hvað þau geta gert með mismunandi hluti.  Þau þarfnast mikillar fjölbreytni í hlutum til að geta stundað þessar rannsóknir sínar, hluti sem eru sífellt nýir og áhugaverðir og það eru hlutir sem er ekki hægt að kaupa úr leikfangabúðum.

Með könnunarleik fær barnið tækifæri til að skoða hluti og tengja þá sínum reynsluheimi.  Einn lykill getur gefið barni tækifæri til að fara í bíltúr eða flugferð og ferðast um heiminn.

Í könnunarleik eru 5 – 8 börn saman í hóp, hinn fullorðni er áhorfandi að leik barnanna, fylgist með og skráir niður leikferli þeirra.

Gott rými er nauðsynlegt til að könnunarleikurinn fái að njóta sín, börnin þurfa að geta hreyft sig töluvert um en vera samt á afmörkuðu svæði þar sem þau verða ekki fyrir truflunum frá öðrum börnum og ekki er boðið upp á önnur leikföng eða annað leikefni meðan á leiknum stendur.

Leikefnið sem boðið er upp á er margvíslegt og er  það geymt í pokum eða aðgengilegum körfum / boxum, t.d. keðjur af ýmsum stærðum, lyklar, bein, öskjur úr pappa og áli, áldollur og  plastdósir af ýmsum stærðum, hólkar úr pappa og plasti, bönd, steinar, keilur, bréfpokar, tappar af ýmsum stærðum, tvinnakefli, skeljar, badmintonkúlur og margt fleira.

Leikurinn stendur í um það bil 45 mínútur.  Tiltekt í lok tímans er einn þáttur leiksins, þar fær hinn fullorðni er með, spjallar við börnin og fær þau til að safna saman leikefninu og flokka í poka eða körfur.  Börnin tengja saman orð og hluti, æfa hugtakaskilning sinn.

Könnunarleikurinn hefur opnað nýja leið í leikskólastarfi okkar á Teigakoti, börnin gleyma stund og stað.  Þau sökkva sér í leikinn og   lítið er um árekstra milli þeirra.  Samskipti barnanna aukast og efniviðurinn bíður upp á óteljandi möguleika fyrir leik þeirra, hvert og eitt stýrir sínum leik án afskipta frá öðrum.

Starfsmenn á Teigakoti hafa verið mjög ánægðir með þennan leik því það gefur okkur tækifæri til að fylgjast með börnunum þróa sig áfram, njóta þess að vera þátttakendur í uppgötvunarleik og sjá þau blómstra í leiknum.  Við höfum upplifað breytingar og þróun en mest höfum við notið þess að sjá börnin ánægð og glöð í leiknum og samskiptin þróast milli þeirra og verða að vináttu.